JERITA PENYALAH JADI MALI
Nyadi dulu kalia kitai Iban enti jadi mali baka anak jadi enggau apai tauka indai, tauka pangkat anak jadi enggau pangkat aya tauka pangkat ibu, tauka mentua jadi enggau
menantu, tauka jadi salah serak nitih ke tusut,ukum iya kena bunoh kadua dua iko seduai ke ngaga penyalah nya, jalai munoh seduai ti jadi salah serak tauka jadi mali tu iya nya enggau buloh aur pantang ke udah di lancham tajam bendar lalu dipantang ka ba tubuh seduai ti di pegulai ka betangkup dalam sitik lubang baka kitai ke numbak ke orang mati, tang nadai di simpan dalam lungun tauka santubong, indu ari baroh lalu lelaki ari atas. Lalu udah seduai iya nya ditumbak, diak buloh aur nya tadi lalu di pantang orang ke udah di padu ke ngereja pengawa mantang seduai nya tadi sampai ke seduai iya parai. Lalu udah seduai iya parai diak sepun buloh aur lalu di tanam atas endur
bangkai seduai ke udah mati alu aur nya tadi di tumbak kena ngingat ka alai pendam seduai iya. Nya alai di sebelah menoa kitai bisi buloh
ke di kumbai orang buloh aur pantang, sereta bisi di peda turun menurun kitai Iban nyentok kemaia hari tu baka ba Nanga Poi ba Kanowit.
Kabuah alai kitai Iban badu agi ngena ukum pantang ngena buloh aur, bepun ari cherita indu siko benama Simbah dulu kelia nitih ka ajar Sengalang Burong. Laban cherita tu enda bepun ari tusut nya alai aku enda tentu nemu sekali ke
cherita tu bendar tauka bula. Nyadi Simbah tu iya nya indu dara, tang nyau kalama diak iya dipeda sida serumah tak nyelai pendiau baka ke
udah betubuh bisi alu udah temu sida ngandong nadai bisi laki. Meda iya ngandong baka nya diak sida serumah lalu nanya iya sapa orang lelaki ke bisi ngayah buyah udah enggau iya beleman.Nyau penyuah sida serumah ke nanya iya, tang Simbah tu lalu enggai madah ke sapa lelaki ti enggau iya beleman nya nyentok ka iya nyau di temu
orang maioh ngandong nadai bisi laki.Ngujung ari kudik,ribut biau balai,ai bah naka pemesai ngampoh ke menua sida ba diak maianya.Ari enggai bado bado ujan ti ngujung sekayu menua nya petang tegayam matahari genam keleman.
Nyau ka mansau kandung Simbah diak menua bado kudik.
Simbah bedau agi enggai nusoi madah ke diri empu sigi digayap menyadi iya empu ti lalu enggau iya beleman sampai ke nyau betubuh
bisi. Nya alai kebuah iya ke enggai madah ngagai orang maioh laban takut ka diri di pantang orang ngena buloh aur. Kandong iya pan nyau chukop sarat bulan, diak Simbah pan lalu beranak tang menoa sida iya balat bendar di pangka ka kudik ti nyadi baru, siang malam ujan enggau kabut nadai ngetu ngetu sepengudah anak Simbah tu ada. Tanah nyau tumpor laban tusor
ti balat bendar di maioh bengkah endor, lalu mensia pan nadai meruan gawa laban hari ke
selalu jai baka nya. Meda hari enda badu kudi, diak apai indai iya enggau sida serumah lalu minta Simbah enda tau enda madah ka sapa lelaki ke enggau iya beleman. Enti iya enda madah, orang maioh sigi udah besemaia deka munoh iya, meda kudik lalu enda nemu badu.
Nyadi hari siti bedau ga orang maioh nya tadi munoh iya,diak tudah Simbah lalu di peda sida
berua nimang anak iya di ruai, lalu tu munyi leka timang Simbah ngagai anak iya ti didinga orang.
Adu adu anak aku ukai nadai apai,
Endang aku tu bisi orang ngayap,
Tang enda kempang aku ka madah,
Takut ka kami duai di tinggang penusah,
Anang meh kita munoh aku ,
Enti aku tu salah tau betimbang,
Lalu tau di ukum nitih ke tusun tunggu,
Tau Besapat di ai, tau besapat di darat.
Bunoh ka babi siko di ai,
Lalu siko di darat,
Ke di kumbai babi emperingat,
Bai ka Nyabor chudur siti kena mantap urat lensat,
Beliong Lajong kena mungga urat melabat,
Jalong Jebong kena nudong tekuyong baroh ungkap,
Pua Kumbu kena kitai miau moa hari ke balat betakat,
Sumpit Tapang di kena ngerejang nyebat lubang kilat,
Chapak sesingkap di kena nekat tanah rarat,
Udah nya baru kami duai di ukum ngena benda rusa,
Kena besapat ngambi ka kena muai penti pemali.
Ninga leka timang Simbah munyi nya dia sida serumah lalu berunding ninga nya. Sida pan lalu madah ka enda nyadi ka munoh iya enti iya
madah ka bagi lelaki ke enggau iya ngereja penyalah nya, tang sida ka ngereja pengawa ngenselan menua nitih ka leka timang Simbah
nya. Simbah pan lalu madah ka sapa bagi lelaki ka enggau iya beleman nya. Iya nya menyadi
iya empu ke benama Lamit. Menyadi iya empu ti ngayap iya ke lalu ngasoh iya ngandong.Nyadi kemalam nya diak sarumah bisi mimpi bertemu enggau apai tuai siko ti ngepan baju berrchurak churak,mua ia nyelai dipeda.Apai tuai nya ngajar sida sarumah nitih leka timang Simbah nya ti enggai meda ari kudik agi,alu apai tuai nya mekat enti ditunda jako nya ambis parai bala peturun iban ko ia madah,alu pia mega ia madah barang sapa kitai dayak jadi melaki bini baka pangkat aki tauka inik ti jadi enggau ucu tau tang disayat babi 1 sekali sepa(sekali udah beranak) tang penulah ia sapa ke pangkat ucu nya ti alah bulu ulih sakit lelangai,enti pangkat aya tauka ibuk ti jadi enggau pangkat anak nitih penamping peturun enti damping disayat babi 3 kali sepa,lalu enti diri menyadik tauka petungal sekali tauka dua kali peturun tau di intu ngau babi disayat 8 kali sepa alu seduai ia tau diyar ari menua,tang dah bisi anak siko baru seduai tau ngindik tanah menua sida ia baru,udah sida ketuai dajar ia diak ia madah diri Sengalang Burong alu ia lesap baka asap tak kekesap mata nadai meh nyengala agi dipeda.
Ari nyau kerebak tawas diak sida sarumah nusi tak sebaka magang mimpi baka demalam tadi diak sida
sama udah dah nemu nya, diak bala maioh lalu ngereja pengawa nitih ka samoa utai ke dipadah ka Sengalang Burong alu nitih ke jako timang Simbah nya kemari.
Sereta udah tembu sida ngereja pengawa ngenselan alu melato menua nya, hari pan lalu manah dipeda baka ka dibuai empeleman. Simbah seduai Lamit tadi enggai nyadi di pejadi ka sida serumah, laban seduai iya tak diri menyadi tampong pala.Nyadi hari ke balat kudik pan nyau tedoh udah bekau penyalah beleman Simbah seduai Lamit nya udah diadu ka ngena adat nitih ka munyi leka timang Simbah alu ari ajar Sengalang Burong.Adat tu pan lalu meruan di tampong kitai bansa Iban nyentok ka diatu. Enti
orang bisi jadi belaki bebini salah serak tauka butang betumbang enggau pangkat anak tauka
apai, tauka indai, tauka mentua enda tau enda diukum ngena adat lama tu, bunoh ka babi kena besapat awak ka menoa enda kudi.
Nyadi ukum Perintah nya siti ga jalai ke baru di kena kitai bansa Iban kamaia hari tu, lalu enda
tau enda ninggang. Enti orang ke jadi salah nadai utai kena betimbang iya tau kena tinggang ukon jel nitih ka adat Perintah. Sitik
nangga dua, reti nya anak di temu salah jadi enggau aya lalu ka di sapat di darat enggau di ai. Enti nitih ka cherita tu anak tau jadi enggau
aya tauka ibu menyadi apai tauka menyadi indai. Tang adat Perintah diatu seduai enda tau jadi. Dua nangga tiga, reti nya anak jadi enggau petunggal apai tauka petunggal indai lalu ka di intu besapat di darat aja enggau babi sekali sepa sereta ukum benda sigi alas. Adat Perintah, lelaki kena ukum tiga puloh kati, lalu indu dua puloh kati pulai ka Perintah tang
seduai tau jadi melaki bini.
Bepun ari cherita tu alai kitai bansa Iban diatu badu agi mantang orang ke jadi salah serak,tauka beleman enggau pangan salah serak. Agi
mega iya ke bendar bepun ari ajar Sengalang Burong ngagai Sera Gunting leboh Sera Gunting
beleman enggau ibuk iya empu, iya nya menyadi indai iya empu ke benama Kumang Bunsu Langit ke
digelar Dara Chempaka Tempurong Alang. Agi mega ba cherita tusut Sengalang Burong kitai tau macha ba lambar 30, diak kitai ka macha
cherita pasal Puntang Raga ngajar Beti enda ngasoh iya mantang Abang ke deka jadi salah
serak enggau Kumangk Tali Bungai laban ketegal nadai kena betimbang.Benda tunggu pulai ngagai nyawa duit dikena
dalam menoa Bagi Kadua kemaia hari baka tu:
Nama Benda = Penyampau ba mata duit.
Sigi Menukul pulai ngagai mata duit RM00.50
sen.
Sigi Jabir pulai ngagai mata duit RM1.00
Sigi Panding pulai ngagai mata duit RM2.00
Sigi Alas muda pulai ngagai mata duit RM4.00
Sigi Alas Ngerang pulai ngagai mata duit
RM5.00
Sigi Rusa pulai ngagai mata duit RM8.00
Sigi Rusa lelaki pulai ngagai mata duit RM10.00
Kabuah alai madah ka pemesai sekeda adat tusun tunggu benda pulai ngagai mata duit diatu laban cherita tu bisi mansa sekeda sida.
Kenu ko jerita dulu kelia tunggu kitai Iban nadai disebut ngagai mata duit nyangka laban apin bisi Perintah tauka nadai duit leboh maia nya
kelia. Rintai tusun tunggu nya samina diteba ba tengah aja, bisi mit agi ari nya ngagai sesingkap mangkok batu lalu bisi mega besai
agi. Tang tusun tunggu ke selalu dikena diatu samoa udah disebut ba diak tadi. Tusun tunggu endang sigi nitih ka baka gaya enggau pemesai
penyalah orang ti ngereja penyalah nya tadi.Bisi penyalah baka pemalu samina tunggu benda aja nadai enggau manok enggau babi.
Bisi mega enggau manok tauka babi aja enda bebenda lalu bisi mega tunggu enggau manok tauka babi sereta enggau benda baka ke
disebut tadi dikumbai sangkar. Ka tambah nya nitih ka gaya penyalah, bisi mega tambah besi,lungga, duku tauka nyabur, ka keris samengat
enggau benda mega ka kurong samengat.
Disebut ngena jako pandak duit nya tauka ganti benda diatu nitih ka pemesai nyawa sida ngagai mata duit baka ke diator datas dia tadi,
Taja diatu enggau duit, tang nama benda agi disebut, enti enda nya nyau ukum Perintah disebut kati tauka pikul. Tang diatu iya nyau
disebut nitih ke atur ba Adat Istiadat Iban 1993
enggau jako Mungkol.
Menya suba aku kala ditusi niang aki ba pasal melaki bini baka to tadi ia nya kisah dua iko diri menyadi beleman ti ngujung seduai ia ditepo ba dalam tajau ti besai sereta ditancang alu ditepok ba tajau,kaki seduai ia ditating ngena batu ba kaki,seduai ia alu dibuai ke ai sungai enggau tajau tajau nya tadi,keno ko jerita tuai lubuk to dikangau Lubuk Tajau Pemali laban agi kekia orang tuai ti mansa to ka amai terpeda ke tajau to ba tebing karangan,bisi ga suah terpeda ke tajau to ba tengah lubuk nya tadi,seduai ke di bunuh to tadi ukai ka jadi tauka beleman enggau diri menyadi tang ketegal petenah siko orang bujang ti pedis ati meda madik laki to selalu nyadi bodyguard madik ia ke indu to tadi ti cukup bajik maia nya suba.Tajau to kala dipeda ba senentang ai Katibas agi taun 1980 an kenya tang pengudah ia ayan ba Karangan Ari diak jerita Tawak to nadai ditemu cerita agi.Keno ko orang tuai suah sida ia ke enda nemu tajau to tajau pemali suah terdinga ke orang nyeru madah baka to "Aya ni kitak aya,ibuk ni kitak ibuk,nama penyalah kami duai menyadi dsimpan dalam benda nyau majak gik ari kudik,kitak salah aya ibuk laban kitai bisi ngembuan anak laki ti bisi ngembuan jai ati enggau kami "....udah jako didinga tak ngenyit tajau to bepusin alu tenggelam ba Lubuk nya.To ketemu ku ba jerita to kaban.
Tamat sudah.
No comments:
Post a Comment