Jerita Ngelesik Ke Ati.
Maia tahun 1990 kenya nyadi bisi sitik menua to ba Kapit din,menua dilalai laban ku ninga jerita ari siko orang tuai ti meri nama ia Ikong(nama samaran).Maia nya ia nitih aya ku pulai ke Kuching taun to kemari laban ka berubat nyuman kediri ba manang bangsa dayak ari Batang Engkarie ti bisi agai kami kia laban manang ukai orang bukai sigi bala kami empu.Nyadi apai tuai bejerita pasal penyelai menua ia ba Kapit din.Nyadi baka to jerita ia.Aaaa..bado nginsap kaban kito ninga jerita ku dulu.Ni kitak ke indu kito dulu negi berapi au.
Nyadi maia tahun 1990 ia bisi bejalai agai kulu sungai menua sida ia ba din.Nyadi tumu pagi nya ia nurun ngemai bekal ngemai ati andal sereta engkira ngiga utai ke lauk laban enda lama nyau musim ngetau nyau nadai ari ngiga lauk pia meh ko ati ia empu.Ka ngaga salai enggau kasam meh ko tudah ia madah.Nyadi pagi nya ia nurun ngena perau sual alu ngemai ukoi 2 iko ia nya tadi.Besual meh tudah tuai tadi nuju kulu sungai nyau bisi ngempat jam baru atai ba dulu sungai ti dituju ia empu.Datai din alu nibar ke jala tudah tuai alu ngetan ginti tambih tauka ginti tan ba genap lubang batu ngica bulih ikan keli sungai.Atai ba lubuk mit alu nginti ga tudah tuai,atai ba rantau alu nyala ngulih ke ikan kulung sereta ngetan ngumpan tekuyung.Nyau kiruh begiga kelauk diak tudah tuai berasai rapal alu ngetu alu bebela ke lauk ia empu ke tengahari nya tadi.Udah meruti ikan enseluai di ulih alu dcampur enggau daun riang,alu dipansuh ia ba unggun api ti digaga ia tadi.Nama deh tak kenyang indah meh tudah ia makai.Nyau berkenang tudah aku,ba kampung puang sigi nyamai makai utai baka to,ka garam ka belacan ka utai bukai dikelauk ba kampung puang sigi kenyang manah kitai makai.Ku kala nyepi utai baka to maia agi mit alu pengudah bebini baka kediato ku kala enggau entua ku enggau bala kebukai lepak ba kampung puang begiga utai lauk babas baka kemiding enggau pako.
Pulai agai jerita Ikong tadi,udah makai diak ia duduk berlelak dulu ari pengenyang tadi.Tak enda berasai bulu peguk ia niki alu asai baka diperati ke orang ari ulu.Malik ia kulu nadai ga orang dipeda tang uduk ia majak nyalak kulu.Uduk ia tadi tak bepusing musin tubuh ia maia nyalak kulu.Nyau meda utai kenya diak ia alu angkat ari duduk alu jampat jampat nyengkau senapang alu nepo ke seterum leka ballshot.Ikong alu beguai bejalai kili.Jari sepiak muat ginti alu sepiak megai senapang.Ikan keli dulih ginti tak tepo ja ba uyut ti dibai ia tadi enda dingkas ari ginti.Tekuyung ti nutu umpan diraup aja enda dipilih ia.nyadi ukoi tadi majak nyalak kulu.Sepik ia asai bisi utai nitih ke ia nyau damping ari ia laban ukoi ia nyalak agai tebiang ti endur ia ngetan ginti tan tadi.Seretai ia muat ginti tak terkenyit ia ninga tebiang ba belakang ia baka dibelat kayu alu engkecit tudah tuai Ikong ke tisi alu muka penchak alu seretai kuntau dam dam dibuka tudah tuai ia laban ka ngetan diri,seretai ia muka nyaia alu nyengkau senapang alu nimbak kelangit.Terkaoh munyi nya tang lebuh ia nurun ke senapang ia kebaruh ia terkenyit meda utai segala kira mesai pala patung ti berchurak kuning ti bisi ngimbai ukoi ia tadi.Ukoi ia jinak mai enggau utai segalanya tadi.Ia baka buah bol tang berchurak kuning emas sereta churak ia nemu betukar nyadi ijau nyadi mansau nyadi burak.Meda utai kenya ia enda kakang kakang ati alu nyintak duku ia alu mantap utai segala nya tadi tang mata duku nyau bilot tauka baka mantap besi,diperati ia manah utai nya tadi peda ia besisik besai tiga tunjuk tang kira seminit utai nadai bersisik dahnya.Meda utai nyelai tadi ia alu nyipak utai segala nya tadi alu ia meda utai bisi sayap alu terebai alu perenching nadai dipeda Ikong agi.Ba kenang aya manang ti kia tadi utai segalanya meh pengaruh bisa ti dikumbai Pemintas Jalai Pemandak Menua ti kala dempu niang Balang ti diberi Sempulang Gana ngica maia Balang bejalai ulih mandak ke ari mandak ke jam ia maia bejalai.Pejalai orang bisi ngembuan to cukup pengelaju naka peneras,ketemu aya Manang to mina orang Nanga Yong bisi ngembuan to suba,maia pagi ia birak ke bukit Guram maia ia pulai ia ngemai daun biro ari bukit guram.Menya mina Bukit Guram ja bisi daun biro.Ari nanga Yong bejalai nuju Bukit Guram dahnya ia pulai baru agai Nanga Yong mina sejam aja.Penjauh bukit Guram enti bejalai kaki nyau bisi ka ngempat ari keno ko orang tuai nusi.Tudah aku rerangap enda nyangka bisi amai utai baka ba dunya kitai ba Sarawak din.Nya meh tudah Ikong nyau ngeaih udah ia nemu utai nya bisi penguntung ba ia empu.Keno ko aya Manang nya ia nusi pengaruh to meh kena Balang megong ke Panggau Libau.Tang pengaruh to lenyau lebuh Balang nemu bisi orang bingking ati enggau ia alu ka ngambi pengaruh to ari ia.Balang ngasuh pengaruh to terebai lebuh ia ba rumah pasung ba Sibu maia nya.Nyadi ti kitak tetemu utai baka to,anang takut ia atai nulung kitak.
Pulai agai jerita Ikong tadi pengudah ia nyipak utai segalanya tadi ia alu mudik kili baru.Datai ba perau ia tadi ia alu muka tali perau ti ditancang ia pun kayu ensurai alu mupuk meh tudah ia bersual pulai ke rumah panjai.Enda mukai mukai ia terpeda ke siko jani tak ngelayang ai sungai diak alu ngangkat senapang ia alu engkecit ari perau alu sereta dah nanam diri ia alu nimbak jani nya ti benung niki tebiang.Nama deh bulih meh ia babi nya tadi.Alu dipanggai Ikong ba perau sual tadi.Udah ia mupuk baru enggau naka ulih jampat laban ka ngerumban ari.Tak enda mukai mukai,ujan nyala alu nyadi ba senentang rantau batu kudik.Nyadi ia ngetu dulu laban nitih penti pemali kitai mesti ngetu enda lama ba endur ujan nyala nya ti kena ujan nyala maianya.Nyadi Ikong pen ngeranggar perau ia agai batu kerangan,ia nyengkau rumput raras alu diselit ia ba pending alu nuduk kediri ba baruh pun buluh,enda mukai mukai ukoi ia nekus,kekaih sereta iko ukoi nya tadi engkilong tauka begulung alu gegetak tubuh ukoi ia tadi,sereta ukoi baka ke takut alu ngerimbai Ikong ke duduk tadi.Seretai nya ukoi ia ti benama Makop ngali ngimbai tisi ia tak dinga Ikong munyi utai nyalak naka pengingar ari ili ia ke duduk tadi.Salak utai baka salak ukoi tang pengingar ia naka pengingar.Sepik Ikong nyau berasai pala ia baka pemesai,bulu peguk tak ngerinjing alu semua bulu tubuh ia tak niki magang.Ati Ikong enda ibuh tunda agi tak ngengam semengat tudah tuai.Ikong nemu nya meh munyi ukoi antu gerasi ti ngasu mensia ti dberi nama Ijih.Seretai ukoi ngetu nyalak diak Ikong bisi terpeda 4 iko mensia pansut ari nanga sungai ari ulu ia.Peda ia mensia 4 iko nya tadi ari jauh tak berupai nyelai mina ngena sirat sereta ngesan utai.Nyadi mensia nya tadi tak ngengkah utai nya kira tangkah serantau pandak ari Ikong ti belalai ba pun ensurai ti ngimbai pun buluh tadi.Puas Ikong berati nama utai disan ia tadi.Tak ngapo enda bejako tudah ia tak meda tanah aya ia ba rumah panjai din tak diperuti alu ditisir di intu orang 4 iko nya tadi.Tak murus dada tudah Ikong.Bisi setengah tudah Ikong nganti orang nya ngelebus ari ngintu utai nya tadi ia alu mupuk beguai pulai ke rumah panjai.Datai dirumah panjai ia ninga sida ke indu nyabak magang.Nemu meh tudah Ikong nya gerenti nyabak ke aya ia ti parai ngenyit ba rumah panjai.Nyadi aya ia tadi bisi buya enda nego alu bisi matah daun empasa maia ujan nyala tadi diak kena ulih antu gerasi ti nurun ngasu..Nyadi menua to bedau agi bisi penti pemali baka to.
No comments:
Post a Comment