Ngerasuk awak ke nusuk alu masok,ngerincang awak ke besindang ulih pulai ke tansang enda midang.Ngeransie awak ke berani ukai dedegi minta pujie ari sida ia ke duduk ba tisi ketegal berani ngetan bangsa menua dirie,rerunduh bikoh awak ke bukai kiroh sigi ka dibatak maia bisi perekuh betempuh lebuh berganjuh enggau munsuh.
Reradai awak ke bala tuai kebukai ninga sera utai besai udah atai ti deka ngemunas bangsa kitai ti ngujung kitai ulih pulai ke Batang Mandai gegendai ngemai tikai gulung bidai.Anang meh reruie meh kitak asie awak ke kami nemu kitak tusah ati ngica kami pergi enggau senang ati ulih pulai ngemai pala limbi bebingkul maioh dtusuk wie nanga muahari meresi nuci ati awak sida mereti kami ukai ulih dkemaruh ba dunya ari.
Ni kitak anak bangat richak uji ngetu dulu kitak ketawa lelekak.Dinga ke sera sebana awak ke kitak ila ingat belama ukai majak rerangga nyau lalat tama ke nyawa.Purih pantih kami ila asuh sekula ngica enda sebana baka to ba jemah ila.Idup meh baka kayu ensurai dedingai ba tebing sungai dipansap enda nemu parai,idup meh baka pun tapang dtebang ngena beliong tak ngilang mina labuh rumput rajang ninggang bandir ngerekang,idup meh baka tebelian makin lama makin tan bedidan ngerawit lelegit nisi emperan.anang idup baka rumput kemalu enti enda salah anang udu meretu retu tau ngeruyup nangkup maia di uru nyadi jagu maia di uwa nyadi nabau bepala dua.
To meh sempama sempekat maia orang kelia ngayau maia konfrantasi nya.
Selamat kerebak tawas kaban...
No comments:
Post a Comment