In memorial Of Sarawak Land

From left its Mudieng Midin, Melai
Apui and Awing. The three women
use the spiky stems of the rotan
vine to grate dried tapioca. Long
Buroi, 1956.

Suba menya kitai to meh sitek pemakai bangsa kitai dayak lebuh lepa pengawa ngintu bumai betaun.Lebuh berambi mulong to lebuh maia nganti penembu udah nugal laban maia nya mulong to ulih digaga nyadi linut enggau kuih.

Mulong to nyadi roti orang kelia enti dipanduk enggau ai tebu manis alu dempa naka penyamai.Pia mega mulong to meri asil lauk ti nyamai lebuh pun mulong ti ditebang ngena kapak alu di inggap ulat tindoh ti nyadi pemakai nomor satu enti musim mantun maia bumai betaun.Ari nya meh ulat tindoh ulih nyadi minyak kena ngulai sayur baka ensabi,enggau bukai.

SERAWAK MYTHOS STORY

Lari ke ujan tetemu ke lubang pedian lari ke sungkup tetemu ke pendam.

Nyadi kelia ba Batang Kapuas bisi apai tuai siko ti bernama Gindam,nyadi Gindam to sekali kumai alu bermalam enggau anak bini ia ba langkau umai ti bejalai nyau ngalih ari baru atai.Maianya dunya bisi aman mimit nadai siga endar.Nyadi
pagi nya dani diak Gindam ngabas bubu,naka meh pengaga ati ia meda bubu ia bulih amai utai kelauk,meda kenya ia gaga at naka pengaga,nyadi maianya ia terpeda ke sida sarumah ia nya Sandai enggau Peragi,ti benung pulai ari ngabas
umai ari ulu umai Gindam.Diak Gindam reraoh ngangau ke seduai ia ngasuh ngalu niki ke langkau sama enggau ngintu utai ulih bubu ia.

Udah tembu ngintu utai ulih bubu Gindam alu bini ia Sinak enggau Peragi mandok lauk nyadi anak Gindam teranggap ja ngipung tunu ikan palau enggau ikan semah,nyadi Gindam enggau Sandai sama ngirup tuak betabas ke tunu ikan,diak Gindam nyau teringat ke bubu ia ba
pemendai ia diak empai dabas agi,diak ia madah ke ngabas nya dulu lebuh meda bini ia ngau bini Sandai nyau ka berenah makai,diak Gindam
madah anang guai dulu laban ia ka nurun ngabas bubu dulu ko ia,tang lebuh ia nurun bini ia reraoh ngangau ke ia nego dulu asi enggai ke punik,ia madah nadai ngacau ko ia laban ia damping ngabas bubu nya.

Tang lebuh ia ngabas bubu tak ngenyit ari ujan nyala ke tengahari.Lebuh Gindam atai dirumah ngemai asil ulih bubu tadi diak tak gesak gesak madah diri parai datai di langkau umai.Nama agi deh tak parai nadai ngajar leka jako ke bini anak meh ia tadi.Diak Sandai nyau temati kutu meda utai bangat nyelai nya.Meda kenya Sandai ngasuh bini Peragi enggau Sinak nguan bangkai
Gindam laban Sandai ka berpadah kerumah panjai ti madah Gindam ti udah mati alu ngemai sida sarumah baum ngubur ke tubuh Gindam.Ngenang jerita Peragi enggau Sinak tadi,enda mukai mukai ari ujan balat mai,diak saduai ia berasai nyau enda nyamai ati majak bulu pegok
niki kepala,diak enda mukai mukai alu bisi orang ngangau tau tiki ke enda langkau saduai ia,diak Peragi
nyenguk meda baka gamal Sandai enggau bala ke bukai bisi 4 iko sida ia tadi.Niki meh ko Peragi,laban langkau umai sida to besai diak
bala ti nyamar mua baka Sandai nya tadi ngintu tubuh Gindam tang penyelai ia orang to baka nusu ngau nginsap tubuh Gindam nyau meriur
meriur sida to tadi meda tubuh Gindam,diak Peragi nganu sida to ngujung sida to bado kenya,tang pegelansik runding Sinak to nemu
utai nyelai nyadi alu ia ngerempung anak ia enggau ia ba dapur din sereta ngangau ke Peragi ke dapur kin,diak Sinak alu narit jari Peragi
madah utai nyelai nyadi,diak orang ti sebaka nunda gamal Sandai ngangau ke saduai ia ngasuh meri ai tuak agai sida ti lelak ngint pemati Gindam,diak Peragi enggau Sinak nyampur ipoh enggau ai tuak tadi ngica ke orang nya mati ko Sinak.Udah Peragi meri tuak agai
bala sida ia diak alu geguai ia lari naban ke anak Sinak kebukai belalai ba baruh rumah,nasib baka
ke nemu bala anak Sinak tak nadai bemunyi sida ia belalai ba rumah lalu seduai ngusut tubuh sida ngena daun bau kentut ngica nadai bau
tubuh mensia. Maianya Sinak bisi anak mit berumur dua tahun
ti bedau tindok di ema ia tadi.Kira enda lama udahnya dinga baru ga bala orang nya ngangau ke Peragi tang Peragi enggai nyaut laban ia
meda utai nyelai nyadi.Meda saduai dkangau nadai nyaut diak saduai nyau ninga utai baka mensia makai utai,ninga orang netak utai meh
saduai ia,ngujung Sinak nyau ka nyeraoh meda darah labuh baka ai ujan ari atas langkau tadi,diak Peragi nilik ari geregar buluh perin tadi diak nyau terpeda sida 4 iko to benung makai tubuh Gindam ti udah parai tadi.Peda ia sida to baka netak babi bebagi tubuh Gindam to tadi,

Enda mukai mukai anak Sinak ke mit tadi nyabak ngujung bala antu ba atas tadi nyau baos ngiga munyi nya.Meda baka nya alu lari meh Peragi enggau Sinak to tadi enda bapai enda meindai ngemai anak Sinak to tadi ngelari kdiri pulai ke runah panjai.Antu to majak ngagai
sida sabuat ia ngujung ba atai ba tanjung ai sungai diak Peragi teterap nyau ka dulih antu nya Peragi enti Kedie enda jampat nyimpung jari
antu nya tadi,nasib keno ke jerita tuai Kedie maia to pulai ari ngabas panjok ngujung ti maia neresa pemintas jalai kaki ninga panjung Peragi ti minta sah minta tolong ari sapa orang keninga panjung sida ia.Meda kenya Kedie alu naban ke jari antu to lari enggau sida ia,tak capuh utai atai ari ulu diak Kedie terkenyit meda sungkup ti dtepan antu 3 iko nitih ari dudi,kedulu tadi tembu reraoh madah diri pedis.Nama agi
deh lari meh sida sabuat,makin laju gik sungkup ditepan sida empat tadi nitih sida Peragi,Sinak enggau anak ia sereta Kedie,nasib atai ba rantau
diak sida tetemu ke sida Sandai ti amai enggau bala kebukai ti atai ngesah pemati Gindam tadi,nama agi tak reradak meh Peragie nusi
jerita ngujung ia enggau Sinak nyau luput lalat laban kelalu lelak nglari kediri empu ari antu tadi,diak bisi manang kitai Iban ti bernama Uban
Sedingan ti nemu ngadu pengawa utai baka diak alu nganti sungkup to tengah lubuk ari ulu rantau nya,dinga utai atai ari ulu nyau bergelemang ai nyau baka dpangka ke nitar utai atai ari ulu,diak manang Uban alu muka puchau muka alau muka sintau diak engkecit Tarang
tuai kayau alu berekak enggau antu nya tadi,ngujung antu nyau ambis pecah pala nyau parai ngujung sida antu empat iko parai alu ditepo ba lungun nya tadi alu lungun nya tadi alu dtanam aki manang Uban Sedingan ba lubang ulak ba lubuk nya.

Pulai gai Kedie tadi ti naban ke jari antu nya tadi,nyadi keno ke jerita tuai Kedie to beberitaamai udah bulih jari antu to tadi laban ia dsumpah ngasuh ia berani ari ke udah sereta Kedie tau berubat,semua mensia ti kacau antu ambis dperubat ia ngujung ia dgelar aki manang Bedindang Seterang Ngempang.Ba jerita tuai ia to meh manang ti paling bisa maianya kelia,laban jari antu dsimpung ia nya jari ucu Sempulang Gana ti di curi antu megga raya.Sebedau Aki manang to mati diak ia bepesan agai semua purih kitai Iban enti kitai ka ngaga pengawa nya kitai nego dulu enti ka ngereja utai bukai dulu.Baka kitai ka makai tang enda nyadi laban bisi utai dikerumban kitai dulu,tau nego dulu kitai asi laban enggai ke punik.."nyengkau mimit alu suap ke mulut,tauka nego ngecar ke jari ba pinggai asi pen tau,sereta tau nego ari kaban ti udah nego dulu ari kitai enti nyau ngilah alu telupa nego kitai jampat bersampi baka to "Dah kie dah kie enggai ke punik,ptuiiii,nadai ku punik udah ku nego tadi..(ngludah ke tanah)"..

Ba penemu tuai utai to sigi amai kaban,ba kampung puang utai to mesti dititih au.Amai ku sembiang tang enti ba kampung puang sigi nego bakato aku.Laban ku kala meda bakih aku Melayu Sarawak empu nyau meriur bubur nasib
jampat ditawar aki tuai rumah Katibas nya,anang macam macam ba kampung puang
ka kuat ni beragama alah meh pemisa nya ti kitai masuk ke dunya sida ia baka kampung puang nya.

Penti Pemali Muai Asi Pumai Kitai Iban ba Sebarang Alai.

Jerita Penti pemali muai asi ditanam kitai dayak.

Ba kenang jerita keserak to aku ngenang siko
lelaki ti bernama Miegek.Menya agik maia taun
60 an kenya bisi kitai Iban mudik kulu gai menua
Pelagus kediato laban ka begiga utai pemakai
nyadi maioh meh sida ia tadi indu enggau lelaki
enggau magang seraya ka meda menua orang ke
Pelagus kin maia ke ai batang rajang langkang
agi menya.Nyadi nyau ke tengahari diak sida to
tadi nyau ngetu makai,ba karangan ti besai,udah
mansau lauk diak sida sama makai magang tang
laban ke Miegek to bam makai enyau berdunjung
pinggai ia alai asi,bisi ngempat pinggai ia makai
nyau kelima pinggai diak nyau enda alah ia tadi
asi ba pinggai ia,laban malu di kejako orang diak
Miegek to tadi alu duduk kebukai ari bala maioh
ke bedau agi ngipung lauk,udah ia nuduk kediri
ba kayu ti tumbang diak ia alu muai asi ba
pinggai ia tadi ba ngimbai pun kayu ti tumbang
enggau jampat jampat takut dipeda orang
maioh.Ia ngelalai asi ti dibuai nya ngena daun
rau.
Nyadi udah ia tembu muai asi nya diak ngesen
kediri ba mua orang maioh diak madah diri
kenyang.Udah tembu makai diak sida kabukai
tadi alu bepun begaga kelangkau ba endur
nya.Udah tembu ngaga langkau sida alu begiga
ke ikan dulu nubai sungai ke mit mit kena kelauk
ke malam negi.Nyadi bisi siko lelaki ti benama
Jali ti nurun ngipa jelu ba menasan apan.Diak ia
ngipa kediri aja,tak enda mukai mukai diak ia
malik kebaruh diak meda siko indu dara ti cukup
bajik duduk ba daun ti baka ditusun,indu nya
senyum senyum meda ia tadi alu ngangau ke ia
ngasuh Jali nurun kebaruh ngica seduai ia
betunga berandau manah ko ia.
Nama agi deh Jali alu nurun pucuk kayu alai ia
ngipa tadi alu kira bisi bisi sepuluh depa ari indu
nya tadi diak Jali teringat ke ajar orang tuai
bakka to,"kena ngelai mensia nya amai mensia
tauka antu ia nya ari garis dua line ari idung
agai mulut atas ti dkangau kitai iban rinsang
asal kitai mensia,enti bisi nya dipeda nya meh
mensia enti nadai nya meh antu" ko ati ia din
bejako kediri.Tak perati ia manah mua indu nya
tadi tak nadai garis tanda kelai nya.Nemu meh
Jali indu nya antu.Diak Jali teringat ajar orang
tuai ti penduduk indu tauka lelaki nya tak duduk
mepek(duduk baka nyembah raja,kedua kaki ia
kebelakang alu jari ia dipelalai ia ba senentang
belakang nya meh antu telanjing kijang).Ti kita
meda utai baka to anang damping sekali kaban
au laban ti kita damping kitak ulih gila ti kitak
kena tikau sirih pinang penunang antu telanjing
to tadi..
Alu ketawa mit meh Jali to tadi udah nemu nya
antu telanjing ti ka nunang ia,diak Jali ngambi
ranting kayu ti udah mati,diak ia alu matah ke
kayu nya tadi diak meh indu alu engkecit alu
bebali nyadi kijang alu bemunyi "caong".Udahnya
Jali ngipa baru ba diak tadi,ia nemu antu
telanjing ti bebali nyadi kijang nya tadi sigi
enggai kia baru laban kijang nemu ia parai
bunuh mensia ti mensia udah nemu ia antu
telanjing.To meh kabuah maioh orang gila
ketegal dayah ke antu telanjing ti maioh bebali
nyadi mensia ti bajik ti sigat tang ia meri kitai
mensia nyadi gila.
Lebuh nganti Jali atai ngipa diak sida kabukai
tadi majak nubai majak ngetan bubu ti
besai.Udah Jali dpeda ngemai babi siko enggau
rusa siko naka meh pegaga ati sida ke
diak.Nyadi kelemai nya capuh meh sida ia
berintu utai dulih Jali tadi,udah berengkah
makai,bakanya ga gaya tudah Miegek to
tadi.Udah tembu makai nyadi malam nya tadi
diak sida pen tindok tang penyelai ia sida
bermimpi sama magang ti meda Miegek muai
anak mit naka pemaioh ba senentang pun kayu
tumbang baka ke pengawa Miegek ti maia
ketengahari tadi enggau kelemai nya ba dalam
mimpi sida ia.Lebuh maia sida meda anak mit to
nyabak ngujung bisi indu siko ti naka pemajik to
tadi ti pansut ari babas alu madah diri anak
Bunsu Sempandai agai sida ia alu ia malik ke
agai Miegek enggau mua naka pegeringat.Ia alu
bejako to"oiii Miegek dik to meh mensia ba
baruh dunya to ti enggai nerima penatai anak
anak kami,peda dik bala anembiak nya nyau
nyabak laban dibuai dik pia aja,ari mit nyentuk
kebesai to dik ngayah dik buyah anak kami ari
menua nisi langit nyin,enti dik enggai enda ibuh
makai sekali ga dik nya,sida ia sigi ulih anak mit
ti tau dempa kitak mensia ngica ke kitak ulih
besai ulih kering ulih idup ari seput anak kami ti
nampung idup kitak mensia,bepun ari to ku
nyumpah dik Miegek sigi enda bulih padi nyentuk
ke wit dik ila." ko indu nganu Miegek.Udah indu
to lesap diak ba diak nyau tedani magang lebuh
ninga munyi burung cecuwit nanda ari ka
pagi.Lebuh sida tedani diak sida ninga baka
anak mit ti nyabak,sida ke diak alu begiga ke
nyawa tadi tang puas sida ngiga tadi diak bisi
indai tuai siko ninga penatai nyawa ke nyabak
nya selepak pun kayu tumbang,diak indai tuai
alu reraoh madah nala kabukai nyawa ke nyabak
nya ba pun kayu ti tumbang,nama agi kia
magang meh sida kabukai,laban Jali to berani
tak reda ia pun kayu tumbang nya tadi tak
rerangap Jali meda penatai nyawa nya atai ari
asi ti dibuai Miegek kemari,nyau alit ati magang
sida kabukai meda utai ke nyadi tadi.Meda sida
ke bedau alit ati diak tuai rumah sida ti sama
enggau ba diak alu ngasuh sida ke indu ngumpul
asi nya tadi alu asuh ia tungkus ngena daun biro
alu dasuh ia beri agai ikan ti bedau idup ba bubu
ditan sida ia kemari.Nama agi deh,ambis meh
asi nya dempa ikan ke ulih bubu tadi.Udah
tembu pengawa nya tadi diak tuai rumah to nusi
jerita semengat padi to tadi baka ke tusi ku
kemari.
Ka nemu gik..pagila ku nusi baru au..bisi
tampong jerita to kaban.Jerita ditusi tuai rumah
to ba pasal jerita semengat padi..nyadi nyentuk
kediato peturun Miegek agi bedau bulih padi enti
bumai sereta pdis mai sida ia ka bulih utai enti
ngiga pemakai ari beras.
Ba nuan kaban,keni ko nuan senentang utai baka
to?

Ti ku meh sigi pecaya penti to laban agi mit ka amai niang aki nganu enti makai nemera ke asi,sema jako seleka leka asi pen enda tau
tinggal ba pinggai.Nyentuk kebesai to semua kami menyadik nadai ningal seleka asi ba pinggai.Amai berau cina pen kami menyadik
kenya laban teleba ari mit sampai ke besai nda ngayah ke asi,laban asi ari asil titik peluh kitai ngulih ke duit.Hargailah Asi to tadi kaban laban
ia tusah dulih kitai.

Jerita Tuai Kelia.

Jerita Penti Pemali Mancing
Pala Ular.

Jerita tuai penti pemali kemik mancing pala ular.Agi suba kira tahun tahun 1980 an bakanya.Nyadi bisi orang penatai begiga ke Ulu
Katibas maianya kira sepuluh buah perau sida ia to kulu kin begiga,nyadi maioh sida to atai kin tadi begiga ke ikan,babi enggau utai bukai meh laban menya agi nadai orang betagang begiga utai ba kampung puang janji madah aja agai Tuai Rumah ti ngempu menua sigi dasuh orang aja sida ia kia laban kelia nadai SISTEM TAGANG baka kediato.Sistem Tagang keterubah nyadi ba menua Sungai Tisa ba Kapit din ti ngetan orang maioh begiga utai hidupan liar ngau peneka ati.Pulai agai jerita tadi atai ba ulu Katibas diak sida sabuat begaga ke langkau naka pemanjai
nebing emperan.Mula ia sida ka ngaga langkau kena tumpu nanga sungai yang orang tuai madah pemali nya,ba penemu orang tuai kelia kitai enda tau ngaga langkau tumpu ai sungai tauka enda tau tindok ba karangan kena tumpu
ai sungai ba nanga sungai nya tadi laban kelia kala nyadi kitai dayak mati dicekak antu raya laban ngempang pejalai ia,baka antu Ranggau enggau Gelayan sigi ka munuh kitai mensia ti tindok ba karangan tumpu ai sungai ba nanga
sungai.Anang encuba kaban ulih bebadi kitai laban utai to,ga ti ka tindok tau kulu gik ari nanga sungai tauka kili ai ari nanga sungai nya tadi.

Pulai agai jerita pun tadi,nyadi bisi siko antara sida ia ngaga langkau
ngempang jalai bedarat kaki tang di lara orang ketuai ia enggai ninga majak ke runding ia aja.Meda bakanya lak ke orang tuai aja laban
orang tuai nemu ia bisi pengering ko ia meh nya.Udah sida begaga tempara kena nyalai utai sereta tembu begiga ke kayu nyadi ke unggun api diak sida begiga utai kelauk dulu sereta ia ke enda enggau tadi berapi.Nyadi lebuh sida ke begiga ke ikan ti namak sungai diak sida ngulu kulu berambat ngena pukat alu enda mukai
mukai bisi siko lelaki ke biak nyau reradak nyeraoh meda pemaioh ikan tama pukat,tak enda mukai mukai ikan ke maioh nya tadi baka ke lesap nadai di peda agi.Tak ransi semua lubuk dambat sida ngena pukat tang nadai meh ikan,nasib bulih ikan kedulu tadi,enti enda pia
nadai berlauk maia makai kelemai nya tadi.Pulai sida ke begiga tadi diak sida alu ngintu utai ke ulih alu maioh meh pansuh sida ia.Ba kampung puang utai dpandok enda tau diresih tauka digoreng laban remaong to ka mai ngiga bau utai kenya.Sereta anang sesekali nunu gerama tauka belacan laban utai nya dijaga ia utai tupi ia ti ia nemu sigi ngiga alai orang ke nunu nya alu enda chamang alu nyerang kitai ti nunu nya tadi.Nyadi remaung to keno ko orang sigi semampai neresap belama agai menua tasik laban remaung sigi ka beridup berikan ba tasik ke besai.Nyadi remaung to suah agi ka ayan ba tebing tasik baka ba Tanjung Lubang,Miri din.Sigi ari kelia menya,Tanjung Lubang to sigi palan alai remaung ngiga tekuyung nyentuk kediato.Amai diato dah moden tang bisi maia bulan enti kitai benasib manah ulih terpeda ke remaong to ti ulih bebali nyadi mensia tauka orang ti kitai kelala.Nyadi kelia ba diak meh tudah aki tuai Kuling selalu bertemu enggau aki Dilang Entai Kuang(asai ku meh to meh penama aki remaung nya ti ngelebus kia).Nyadi aki remaung to enda ngacau orang enti orang enda ngacau alai ia ngiga pemakai.Ia ngiga pemakai ba diak ka lelemai ari.Kelai orang bisi bebadi ba endur nya,nya petanda orang nya kena kacau ulun ia Dara Semenyang tauka Dayang Nunang.

Pulai agai pun jerita tadi,nyadi bisi siko lelaki ti penama Ucung ti enggau sida kabukai tadi tak terkenyit meda ular pasir ti dindik ia. Ngasai diri nyau gelesi sereta terkenyit diak Ucung alu nencang pala ular nya tadi ngena batu ngujung ke ular nya mati,laban ke agi pedis ati ketegal terkenyit diak Ucung alu kemik alu mancing ai kemik ia ba pala ular nya.Seretai ia
tembu bado kemik nya tadi peda tak enserul ular kebukai ari pasir tak entanjal ular ari reba alu temepak ular ari pucuk kayu,keno ko sida kabukai ti sama enggau meda tak naka pemaioh ular tadi pansut ari
batu ari pasir ari tebing ari pun kayu ari ular mit ti enda bisa pansut ngujung ular ke bisa sereta kebesai pansut ti ngelingngi tudah Ucung ti ke bediri ba karangan,alu sida kabukai enyau  begetar getar kaki laban meda utai naka penyelai nya nyadi.Bisi orang bujang ti bernama
Sirai nyau terkemik ba tancut laban meda utai baka nya nyadi.Semoa ular ngelingngi tubuh Ucung ti berdiri nyau nyabak minta sah minta tolong,tang bisi apai tuai siko ti tau dkumbai bisa penemu alu ngasuh Ucung lubah lubah duduk,nasib Ucung ka nitih,keno ke orang ti nusi to,ular majak datai sedatai nyau penuh tanah seberai nyau penuh
kerangan ari ulu enggau ili laban pemaioh ular kabukai ti datai,tak enda berasai pansut bunsu ular ti burak perencing tubuh alu mata ia berkilat alu pala ia bisi geliga ti perencing.Kira enda lama dahnya diak apai tuai ti bisi penemu to tadi alu jampat nengkira piring sekali lapan,jari Ucung dsayat mimit kena ngulih ke darah ia kena nyengkelan piring enggau nyengkelan patung
kayu purang ti digaga,alu apai tuai nya jampat ngasuh sida ke bukai nebang kayu purang,udah kayu purang ditebang diak apai tuai to tadi alu ngari kayu purang nya ngena gari Ucung kebukai alu ia ngambi darah manok di gulai enggau darah Ucung alu ditanjah ia ba kayu purang nya tadi.Ia alu duduk maca pucau maca leka biau.
Lebuh ia tembu ngereja pengawa nya diak tak meregum tanah dindik utai,pemesai betis orang nya bisi 5 pemerap ti dipeda terengkah ba tinting bukit sepiak ba bukit seberai.Meda kenya diak apai tuai ti benama Chiri to tadi alu ngambi
Ucung udahnya patung ti digaga pia aja ti dah dibaca alu dengkah nganti Ucung,seretai Ucung dah selamat diak Apai tuai ti benama Chiri to
tadi ngunsut tubuh Ucung ngena tanah ladu ti ba tanah ngica antu enda ngelala ia agi alu telih ia
tadi alu di unsut ngena kapo,ngica antu enda ensium bau darah Ucung ba tubuh kediato.Nasib tudah Ucung to tadi agi idup ti orang nadai bisi penemu baka apai tuai nya tadi bisi
ari ia dempa antu tinggi.Tubuh kayu ti nganti Ucung tadi dijengkau utai naka pemesai nya jari nyau mesai pemerap anak mit tunjuk jari ia
dipeda sida ke diak.Malik Ucung ke langit bangkat tak dedegi tubuh antu gerasi ngilah pun tapang buku lutut ia.Bisi ke enda tan ati enyau luput meda utai baka nya.Lidah antu gerasi kuar kuar bercabang 5 berpala ke ular.Pengudah nya antu gerasi nya alu rapas dipeda sida ke enda luput tadi.Udahnya sida jampat jampat pulai ke langkau.

Sitik pekat aku anang sesekali kitak ngempang ngaga khemah senentang pejalai kaki ti selalu
dipansa kitai ba kampung puang laban kitai sigi bulih di cekak antu ti jai,ti ba tisi jalai enda ngawa ko orang tuai madah.

Naka to dulu kaban.Ila ku nusi baru.

Kampung Jerung Puang Kitai

Anka baka to kampung kitai kelia menya deh kaban.Besai besai besai kayu kelia tang diato?ni bisi kenya agi.Mina tinggal kayu purang kayu sengapa ja ke bedau.Tebelian sigi dulu ditebang di ambi company kayu.

Baka kayu geriting sigi ti teguh ari semua kayu sigi ambis ditebang laban kualiti kayu to endang nomor satu kering ari kayu tebelian.Makin lama kayu geriting makin liat agi batang ia ti dah di sayat digaga ke tiang rumah.Enda baka tebelian ti berupai ka repuk enti lama,indu utai sampuk sigi ka nutu tebelian,agi kayu tebelian to alah ari simen ti kayu tebelian to digaga nyadi pengepit acuan pintu nisi simen.Kayu tebelian mina teguh sereta tan enti dalam ai sungai aja.Enda baka kayu geriting ti teguh ba darat enggau ba ai.Kayu geriting to mansau batang ia,daun ia mit.Tebelian sigi mahal ba pasaran penjualan perabot tang rega kayu geriting entah ku enda nemu,ti kayu geriting murah rega ia kaban tau beli maioh keh.

Mitos kayu tebelian orang kelia.

Kayu tebelian to sejenis kayu ensurai bukit keno ko orang tuai kelia tang pengudah tekura nyau nepo pengaruh kebal pendua ba lubang pun kayu ensurai bukit nyau bebali liat sereta teguh.Tang asal pengaruh kebal kesatu di tepo tekura ba kayu geriting lebuh ia di gagai burung garuda ti ka ngerampas kebal ia nya.

Nyadi pengamai bisi amai ke enda mitos burung garuda to meh ka dipansik aku dah to laban mitos orang kelia ka amai nusi burung garuda to besai,sereta gamal burung garuda baka burung helang laut.Ila aku nusi baru au.

Penyayau Enda Luya Nyentuk Ke Pendam

Berkunsie jerita kitai Iban ti dikanggau PENYAYAU SAMPAI KE PENDAM tang ukai baka gambar to jerita ia...Agi mit ku ninga jerita to..

Nyadi bisi kitai iban ti bernama Empati(nama samaran) ti beridup enggau bini ia Suti(nama samaran) ba sitik menua kitai ba Sarawak din.Seduai jadi melaki bini naka pengelama enyau bulih 9 anak.Maia seduai begulai nadai kala seduai ia belaya enggau pangan diri.Nyadi lebuh anak seduai ia kebiak dah nemu ngidup kediri diak Suti nyau dibai petara pulai ke langit laban nyau enda alah diperubat ba sepital.

Lebuh malam nyengaie Suti,diak Empati enggai jauh ari tubuh niang bini nyentuk ke pendam.Nyadi pendam bini ia dengkah bala anak ia ba tanah sida Empati empu nitih ke jako bini ia ti madah ka berkubur alai endur seduai ia melaki bini terubah muka tengalan umai lebuh udah kediri ngaga ruang bilik kediri empu ba kebun buah. Pengudah sida kabukai nyau ka pulai udah ngubur ke niang bini Empati,Empati enda ngisit sesekali ari pendam bini ia.Ia enda nyabak tang ai mata seruran labuh.Puas dumbuk bala anak ia kelaki sereta kabukai ke bedau pulai ari palan kubur tang Empati enggai mindah kabukai mina duduk aja ngimbai kubur niang bini ia.Meda baka nya diak bala anak kelaki seduai ia alu temati kutu alu Tuai Rumah sereta menyadik Empati kabukai meri jako tangkan ngajar ia ngasuh ia enda bakanya tang sida kabukai enyau rerangap ninga Empati bejako baka to...

"Suba aku sebedau jadi enggau udah jadi engau Suti,ku berdanji enggau Suti alu Suti berdanji ngau aku,kami duai sigi ngibun pangan diri sampai ke tubuh kami duai ia lesi bebadi ngejang pergi,laban ku nitih janji kami duai,ku enda kempang bula kedanji laban pengerindu enggau peyayau kami duai ia sigi enggai ngemula.Pengerindu kami duai ia ukai ari ka jadi melaki bini ka nelesak ke anak aja tang peyayau ka segulai beridup tusah engau senang,to kebun ke tanda penyayau enggau pegerindu kami duai nyentuk ke ku parai ku enggai pulai ke rumah panjai laban aku enggai bula kedanji kami duai."...

Meda bakanya diak sida kabukai bado bermunyi,alu pulai meh sida kabukai alu anak kebiak aja ngibun alu ngemata ke apai ia Empati takut enggai ke apai ia munuh diri.Tumu pagi sitik diak anak Empati sereta menantu ia ke laki alu ngaga langkau ngimbai kubur niang indai sida ia laban ngica ke apai sida ia enda kena ujan enggau panas.Peyiru enggau peyinu anak Empati sigi murih ari niang indai sida ia.Bisi meniga ari udahnya enda ga Empati nginsit enda niki langkau ti digaga bala anak enggau menantu ia,meda bakanya diak sida ngaga langkau nya beratap panjai nyau mayung pendam niang bini Empati.

Kubur niang bini Empati digaga sida manah agi,alu Empati tindok ngimbai bini ia ti ngena katil ti digaga bala anak enggau menantu ia ke laki tadi.Nyadi pemanah anak enggau menantu ia ke indu nyau tiap ari nganjung pemakai agai tudah Empati nyentuk genap taun 1997 kira bisi 10 taun dah berlalu diak Empati enyau nadai pengerai laban nyau sakit.Sebedau Empati madam ke seput ke pagi nya diak ia bejako ngajar meri sempekat jako tangkan agai bala anak ia enggau menantu ia.

"Igat enggau endu,kitak ucu..pengerindu kitai mensia ukai berpanggai ba pengeran ati aja tang berpanggai ba untak kitai mikir jalai kena nyeliah ari penusah ngerusak ruang bilik diri empu.Pemerinsa maia senang dkingat alu peyenang dikingat maia merinsa ukai peyenang dkingat maia senang alu pemerinsa dkingat maia merinsa.Penyayau ukai ari pengerindu tang penyayau ari  siko mensia ti beguna ke siko tawing begulai sejalai enggau ia ti sama runding nadai kuing,amai bertaun taun aku di Brunei berkuli tang indai kitak ulih negi alu niri ke ruang bilik  kitai nyadi ke manah ari udah,amai indai kitak indu ia enda beguna ke laki bukai kena muai pengelenggau ati laban ia nemu aku aja ulih ngemuas ke ati kami duai aja sigi enda sanggup buya ke pangan diri laban ati enggai ngemula ke penyayau tuci,nyema aku mati,ku puas ati laban enda kala ngenusah ke anak bini nyadi kampar ba dunya penguji.Nya alai kitak anak gengam danji ba jari ukai ba ati,genggam sumpah ba tubuh diri ukai ba ati alu ba untak ti ka ngerusak.Kami duai niang indai kitak suba berdanji sigi sanggup ngibun pangan diri ka ia lesi sigi tetap ba sisi.Diato ku gaga ku dah terpegai kesemua janji kami duai ia,amai ia dulu pergi ia sigi nganti ba pintu sebayan laban ba din ia ka nunai ke danji.Minta ampun ku anak enti aku ngenusah ke kitak ngelamato alu aku ngampun peyalah kitak ba aku,agai Sutie,sulu to ku atai nitih nuan,ku minta ampun laban enda ulih panjai ari  ngimbai rumah nn ba dunya penguji,ba sebayan tua jadi baru melaki bini,nganti aku atai nn perembam malam ari.."

Udah Empati bejako bakanya,diak ia narit seput tiga kali aja alu lesi meh tudah mensia baruh mua ari,pegi ngemai at ngemai janji ti udah ditunai danji..Kubur Empati alu ditanam ngimbai niang bini ia.Ngica seduai ia segulai sejalai ba sebayan din.

Jerita to sigi jerita amai ti ku kala dinga ari siko anak bala nembiak ari ti sama rumah panjai enggau sida Empati to.Alu ku kala ninga jerita ari  bala anak Empati to empu ti kebiak amai nya.

Sapa Empati??Mina petara ja nemu..Ku enggai nusi penama amai ia.Cukup meh kitai berkenang pengerindu enggau peyayau ia ba page ku dito..

My page Google.

Ba ati aku,mina ka nyerakup kitai bansa ba Sarawak awak enda nunda bala laut Malaya ti rata rata sida ia enggai meda bansa bukai.Sida ia mina ka idup ba kelompok sida ja.Nya alai ku mesau kitai dayak ba Sarawak anang baka nya laban kitai Sarawak enti diripih manah ukai bangsa ari Malaya.Ka kitai Kristian tau ka muslim tauka agi ba pengarap lama,kitai dayak mesti teguh penemu ti ka serakup enggau pangan diri sebansa enda ngira agama kitai segulai sejalai.

Ari kelia kelia  kitai dayak kelebih agi ukai bisi pengarap baru baka kediato,enya alai ku mekat agai bansa diri,anang bangat ka mengkafirkan mensia ti bedau ba pengarap lama.Allah Taala siko tang kitai mensia ti meri maioh penemu ajar Allah Taala nyadi bepuluh itek..

Arap kitak Like page google to,ketanda kitai diri sebilik ba sitek ruai Pematak Kayau Menua sereta ba sapiak ruai Sarawak Borneo Untold Story.Sayau Selalu agai kitak.

https://plus.google.com/110906794287810149926